Мадриднинг "Реал" клуби ҳужумчиси Килиан Мбаппе жорий мавсумда одатдагидан кўра кўпроқ жароҳат олмоқда.

Франциялик футболчи тиззасидаги жароҳати туфайли "қаймоқранглилар"нинг яқинда Чемпионлар лигаси доирасида "Бенфика"га қарши ўтказилган ўйинини ўтказиб юборди. Кутилишича, форвард яна бир неча ҳафта давомида майдонга туша олмайди. "Marca" нашрининг қайд этишича, Мбаппе жорий мавсумда жароҳатлар сабабли жами 53 кунни ўтказиб юборди — бу 27 ёшли футболчи учун шахсий антирекорд ҳисобланади. Бундан олдинги энг ёмон кўрсаткич 2019/20 йилги мавсумда (51 кун), Килиан "ПСЖ" шарафини ҳимоя қилган вақтда қайд этилган эди.

Соғлиғидаги муаммолар Мбаппега рақиб дарвозаларини мунтазам равишда ишғол қилишга халақит бермаяпти: унинг ҳисобида барча турнирларда 33 та ўйинда 38 та гол мавжуд.