"Бавария" ҳужумчиси Харри Кейн Дортмунднинг "Боруссия" жамоаси устидан қозонилган ғалабали ўйиндан (3:2) сўнг журналистлар саволларига жавоб берди. Инглиз футболчиси ушбу учрашувда дубль қайд этиб, баҳс қаҳрамонига айланди. Мюнхенликлар Бундеслига жадвалида иккинчи ўринда бораётган "арилар" билан орадаги фарқни 11 очкога етказишди.
"Биз чемпионлик пойгаси учун жуда муҳим бўлган ўйинда ғалаба қозондик. Ҳисобда ортда қолаётган бўлсак-да, ўз ўйинимизни намойиш этишда давом этдик — "Боруссия" ҳафта ўртасидаги Чемпионлар лигаси ўйинидан сўнг чарчаб қолишини билардик. Таслим бўлмадик. Бу ерга келиб ғалаба қозониш — ҳақиқатан ҳам ўзгача туйғу. Ўзимиз билан фахрлансак арзийди", — дея Кейннинг сўзларини келтиради Bayern & Germany.
Харри Кейннинг жорий Германия чемпионатидаги голлари сони 30 тага етди. Бундеслига мавсуми якунигача атиги ўнта тур қолди.
