"Барселона" ярим ҳимоячиси Гави тиззасидаги жарроҳлик амалиётидан сўнг тез орада майдонга қайтади. Хавбек август ойидан бери майдонга тушмаётган эди.
"The Touchline" нашрининг таъкидлашича, "Барселона" ўз ярим ҳимоячисини дарҳол "жангга ташламоқчи" эмас. Режага кўра, у худди Марк Берналга қўлланилган ёндашув каби, аста-секинлик билан асосий таркибга қайтарилади.
Келгуси ҳафталарда Марк Берналь ва Марк Касадо майдонда кўпроқ вақт ўтказиши, Гавига тушадиган юклама эса босқичма-босқич ошириб борилиши кутилмоқда. Ҳеч қандай таваккалчиликка йўл қўйилмайди. Флик Гавини юқори баҳолайди ва уни ноёб ўйинчи деб ҳисоблайди. Мураббий келажакда Гавига катта умид боғлаган ва уни яна йўқотиб қўйиш хавфини истамайди.
Жорий мавсумда 21 ёшли Гави Ла Лиганинг фақатгина иккита учрашувида майдонда кўриниш берди ва битта голли узатмани амалга оширди.
