Келаётган ёзда Муҳаммад Салоҳнинг эҳтимолий кетишидан сўнг, «Ливерпуль» раҳбарияти асосий урғуни ярим ҳимоячи Доминик Собослаига қаратишни режалаштирмоқда. Бу ҳақда The Touchline нашри хабар бермоқда.
Манбанинг маълумотларига кўра, «Ливерпуль» жамоани айнан Собослаи атрофида қуришни мақсад қилган, чунки клуб унинг ўйин хусусиятларига тўлиқ ишонади. Бундан ташқари, мерсисайдликлар венгриялик футболчининг етакчилик қобилияти ва жамоага таъсири сезиларли даражада ўсиб бораётганини юқори баҳоламоқда.
Собослаи 2023 йилдан бери жамоа шарафини ҳимоя қилиб келмоқда. Жорий мавсумда 25 ёшли ҳужумкор ярим ҳимоячи барча турнирларда 37 та ўйинда иштирок этиб, 10 та гол урди ва 8 та голли узатмани амалга оширди.
Собослаининг «Ливерпуль» билан амалдаги шартномаси 2028 йилнинг ёзига қадар мўлжалланган.
