Франция Лига 1 матбуот хизмати 15 март, якшанба куни бўлиб ўтиши керак бўлган 26-турнинг «ПСЖ» ва «Нант» жамоалари ўртасидаги учрашуви апрель ойига кўчирилганини эълон қилди. Бу ҳақда турнирнинг X ижтимоий тармоғидаги расмий саҳифасида хабар берилган. Таъкидланишича, ўйинни кўчириш «ПСЖ»нинг илтимосига биноан ва «Нант» клуби билан келишилган ҳолда амалга оширилган.
Ушбу қарор парижликларнинг УЕФА Чемпионлар лигаси 1/8 финали доирасидаги Англиянинг «Челси» жамоасига қарши кечадиган иккита муҳим ўйинига муносиб тайёргарлик кўриши учун қабул қилинган. Маълумот учун, «ПСЖ» мусобақанинг амалдаги ғолиби ҳисобланади. Дастлабки учрашув 11 март, чоршанба куни Парижда бўлиб ўтади. Жавоб ўйини эса 17 март, сешанба куни Лондонда ўтказилиши белгиланган.
Лига 1 Директорлар кенгаши «Нант» билан ўйинни 20-26 апрель кунлари оралиғидаги ҳафтага кўчиришга қарор қилди. Учрашувнинг аниқ санаси кейинроқ маълум қилинади.
