Fransiya Liga 1 matbuot xizmati 15 mart, yakshanba kuni bo‘lib o‘tishi kerak bo‘lgan 26-turning «PSJ» va «Nant» jamoalari o‘rtasidagi uchrashuvi aprel oyiga ko‘chirilganini e’lon qildi. Bu haqda turnirning X ijtimoiy tarmog‘idagi rasmiy sahifasida xabar berilgan. Ta’kidlanishicha, o‘yinni ko‘chirish «PSJ»ning iltimosiga binoan va «Nant» klubi bilan kelishilgan holda amalga oshirilgan.

Ushbu qaror parijliklarning UYEFA Chempionlar ligasi 1/8 finali doirasidagi Angliyaning «Chelsi» jamoasiga qarshi kechadigan ikkita muhim o‘yiniga munosib tayyorgarlik ko‘rishi uchun qabul qilingan. Ma’lumot uchun, «PSJ» musobaqaning amaldagi g‘olibi hisoblanadi. Dastlabki uchrashuv 11 mart, chorshanba kuni Parijda bo‘lib o‘tadi. Javob o‘yini esa 17 mart, seshanba kuni Londonda o‘tkazilishi belgilangan.

Liga 1 Direktorlar kengashi «Nant» bilan o‘yinni 20-26 aprel kunlari oralig‘idagi haftaga ko‘chirishga qaror qildi. Uchrashuvning aniq sanasi keyinroq ma’lum qilinadi.