Саудиянинг «Ан-Наср» клуби устози Жорже Жезуш жамоанинг юлдуз марказий ҳужумчиси Криштиану Роналдунинг жароҳати ҳақида фикр билдирди. 41 ёшли футболчи «Ал-Фейҳа»га қарши баҳсда (3:1) жароҳат олди.
«Роналду мушакларида оғриқ сезди. Биз таваккал қилмасликка қарор қилдик, шу сабабли уни алмаштирдик. Тиббий ходимларимиз жароҳатнинг қай даражада жиддий эканини баҳолашади», — дея мутахассиснинг сўзларини A Bola нашри келтирмоқда.
Эслатиб ўтамиз, бўлиб ўтган учрашувда Криштиану 11 метрлик жарима зарбасини (пенальти) голга айлантира олмади.
Жорий мавсумда португалиялик футболчи Саудия жамоаси сафида 26 та ўйинда майдонга тушди. Ҳужумчи ўз ҳисобига 22 та гол ва 4 та голли узатмани ёздириб қўйишга улгурди.
