Saudiyaning «An-Nasr» klubi ustozi Jorje Jezush jamoaning yulduz markaziy hujumchisi Krishtianu Ronalduning jarohati haqida fikr bildirdi. 41 yoshli futbolchi «Al-Feyha»ga qarshi bahsda (3:1) jarohat oldi.
«Ronaldu mushaklarida og‘riq sezdi. Biz tavakkal qilmaslikka qaror qildik, shu sababli uni almashtirdik. Tibbiy xodimlarimiz jarohatning qay darajada jiddiy ekanini baholashadi», — deya mutaxassisning so‘zlarini A Bola nashri keltirmoqda.
Eslatib o‘tamiz, bo‘lib o‘tgan uchrashuvda Krishtianu 11 metrlik jarima zarbasini (penalti) golga aylantira olmadi.
Joriy mavsumda portugaliyalik futbolchi Saudiya jamoasi safida 26 ta o‘yinda maydonga tushdi. Hujumchi o‘z hisobiga 22 ta gol va 4 ta golli uzatmani yozdirib qo‘yishga ulgurdi.
