«Челси» бош мураббийи Лиам Росеньор ўз шогирдлари нима сабабдан кўп қизил карточка олаётгани ҳақидаги саволга жавоб беришга ҳаракат қилди. Жорий мавсумда Лондон клуби аъзолари 7 марта майдонни вақтидан олдин тарк этишди. Еттинчи четлатиш 1 март куни «Арсенал»га қарши кечган ва 1:2 ҳисобидаги мағлубият билан якунланган баҳсда юз берди.

«Бунинг сабабини айтиш қийин. Бизга ўйинларда ғалаба қозонишга ҳаракат қилганимиз учун маош тўлашади. Агар биз бу муаммони ҳал қилишга уринмаяпмиз деб ўйласангиз, демак сиз телбасиз. Биз буни тўғирлашга ҳаракат қиляпмиз. Баъзан хатолардан оғриқ орқали сабоқ олишга тўғри келади. Мен буни «Лидс» ва «Бёрнли» билан ўйинларда очко йўқотганимизда ҳис қилдим. Ўйиндаги ижобий жиҳатларимиз ҳақида гапиришни истамайман, чунки улардан ҳеч қандай фойда кўрмадик. Бу жуда аламли», — деди Росеньор «Sky Sports» нашрига берган интервьюсида.

Ушбу ўйиндан сўнг «Челси» 45 очко жамғарган ҳолда турнир жадвалида олтинчи ўринни эгаллаб турибди.