«Рома»нинг ўнг қанот ҳимоячиси Уэсли Франса «Ювентус» дарвозасига урган голини «Реал Мадрид» вингери Винисиус Жуниор услубида нишонлади.

22 ёшли бразилиялик футболчи А Сериянинг 27-туридан ўрин олган баҳсда (3:3) учрашувнинг 39-дақиқасида дарвозанинг узоқ юқори бурчагини аниқ нишонга олиб, ҳисобни очди. Голдан сўнг Уэсли «Стадио Олимпико»даги бурчак байроқчаси ёнига югуриб борди ва қўлларини юқорига кўтарганча, байроқча устунини икки оёғи орасига олиб, рақс тушди.

Уэсли жорий мавсумда А Сериянинг 24 та ўйинида майдонга тушиб, 4 та гол уришга муваффақ бўлди.

Эслатиб ўтамиз, Винисиус Жуниор Чемпионлар лигаси доирасида «Бенфика»га қарши кечган биринчи ўйинда (1:0) гол ургач, худди шундай бурчак байроқчаси олдида рақс тушиб, кейин орқасидаги фамилиясини кўрсатган эди. Ўша учрашувдан сўнг бразилиялик футболчи ва «бургутлар» ҳужумчиси Жанлука Престианни ўртасида низо келиб чиққан — Винисиуснинг сўзларига кўра, рақиб уни «маймун» деб ҳақорат қилган. Мадридда бўлиб ўтган жавоб баҳсида (2:1) эса «қаймоқранглилар» юлдузи гол ургач, яна бурчак байроқчаси ёнида рақс тушган эди.