Лондоннинг "Арсенал" клуби устози Микель Артета "Челси"га қарши бўлиб ўтган баҳсда жамоа дарвозабони Давид Райянинг кўрсатган ўйинига изоҳ берди. "Канонирлар" ушбу учрашувда 2:1 ҳисобида ғалаба қозонишди.
"Давид учрашув тақдирини ҳал қила оладиган дарвозабонлар тоифасига киради. У доимо диққат-эътиборини сақлаб қолади. Унинг охирги сэйви... Давид ақл бовар қилмайдиган ишни амалга оширди. Зарба берилган лаҳзада юрагим тўхтаб қолишига бир бахя қолди. Аммо Райя жамоани қутқариб қолди", — дея испаниялик мутахассиснинг сўзларини келтирмоқда Daily Mail нашри.
Артета шогирдлари 64 очко жамғарган ҳолда Англия чемпионати турнир жадвалида пешқадамликни давом эттиришмоқда. "Арсенал" ўзининг энг яқин таъқибчисидан беш очко олдинда бормоқда.
