«Бавария» ярим ҳимоячиси Леон Горетцкага «Интер», «Милан» ва «Ювентус» клублари қизиқиш билдирмоқда.

Италиянинг топ-клублари 31 ёшли германиялик футболчи билан мавсум якунида, у эркин агентга айланганидан сўнг шартнома имзолаш имкониятини кўриб чиқишмоқда.

Горетцканинг ўзи эса А Серия вариантларини фақатгина АПЛга ўтиш режаси амалга ошмай қолган тақдирдагина кўриб чиқади. Айни дамда Англияда унга «Арсенал» даъвогарлик қилмоқда. «Тўпчилар» ярим ҳимоячини ҳали январь ойидаёқ сотиб олишга уриниб кўришган эди, бироқ футболчи «Бавария» раҳбариятига шартномасини охиригача етказиб қўйишга ваъда берган.

Шунингдек, Горетцкага «Тоттенхэм» ҳам қизиқиш билдирмоқда, аммо футболчи фаолиятини Чемпионлар лигасида иштирок этадиган клубда давом эттириш ниятида ва кўпроқ «Арсенал» вариантига мойиллик билдирмоқда.

Германия Бундеслигасининг жорий мавсумидаги 21 та учрашувда Горецка ўз ҳисобига 2 та гол ёздириб қўйди.