Марк Берналнинг дубли «Барселона»га Испания Кубоги ярим финалининг жавоб учрашувида Мадриднинг «Атлетико» жамоаси устидан ғалаба келтирди (3:0), бироқ бу финалга чиқиш учун кифоя қилмади.

Каталонияликлар тўртта тўп фарқини йўққа чиқара олишмади. Икки ўйин натижасига кўра умумий ҳисоб — 4:3 «матрасчилар» фойдасига ҳал бўлди.

«Ушбу учрашувдаги ўйинимиздан жуда мамнунман. Агар шу руҳда давом этсак, кўп нарсага эришамиз. Биз 0:4 ҳисобидан сўнг вазиятни ўнглай олишимизга ишонгандик, лекин, афсуски, бу амалга ошмади. Финал ҳуштагидан сўнг бутунлай ҳолдан тойган эдик, бироқ бу эмблема шунга лойиқ. Иккита гол урганимдан хурсандман. Мухлисларга ажойиб қўллаб-қувватлашлари учун миннатдорчилик билдираман», — дея «Managing Barca» Берналнинг сўзларини келтирмоқда.

18 ёшли ярим ҳимоячи учун ушбу дубль «Барселона» асосий таркибидаги фаолиятида биринчиси бўлди.