«Барселона» спорт директори Деку Мадриднинг «Атлетико» жамоаси устидан қозонилган 3:0 ҳисобидаги ғалабадан сўнг ўз фикрларини билдирди. Ушбу натижа Испания Кубоги финалига чиқиш учун кифоя қилмади.

«Кўк-анорранглилар»нинг дастлабки тўқнашувдаги 0:4 ҳисобидаги мағлубияти ярим финал баҳси тақдирини ҳал қилиб қўйган эди.

«Бугун биз учта гол урдик, бироқ 0:4 дан сўнг вазиятни ўнглаш ўта қийин бўлиши бошиданоқ аён эди. Шу сабабли ҳам биринчи ўйинда Кубарсининг голи бекор қилинганидан қаттиқ ғазаблангандим», — дея Barca Universal нашри Декунинг сўзларини келтирмоқда.

Эслатиб ўтамиз, Пау Кубарси Мадриддаги баҳснинг иккинчи бўлими бошида, таблода 4:0 ҳисоби «матрасчилар» фойдасига порлаб турган вақтда гол урган эди. Ўшанда ҳакамлар офсайд сабабли голни инобатга олишмаганди.