«Barselona» sport direktori Deku Madridning «Atletiko» jamoasi ustidan qozonilgan 3:0 hisobidagi g‘alabadan so‘ng o‘z fikrlarini bildirdi. Ushbu natija Ispaniya Kubogi finaliga chiqish uchun kifoya qilmadi.
«Ko‘k-anorranglilar»ning dastlabki to‘qnashuvdagi 0:4 hisobidagi mag‘lubiyati yarim final bahsi taqdirini hal qilib qo‘ygan edi.
«Bugun biz uchta gol urdik, biroq 0:4 dan so‘ng vaziyatni o‘nglash o‘ta qiyin bo‘lishi boshidanoq ayon edi. Shu sababli ham birinchi o‘yinda Kubarsining goli bekor qilinganidan qattiq g‘azablangandim», — deya Barca Universal nashri Dekuning so‘zlarini keltirmoqda.
Eslatib o‘tamiz, Pau Kubarsi Madriddagi bahsning ikkinchi bo‘limi boshida, tabloda 4:0 hisobi «matraschilar» foydasiga porlab turgan vaqtda gol urgan edi. O‘shanda hakamlar ofsayd sababli golni inobatga olishmagandi.
