«Ювентус» ҳужумчи Душан Влахович билан шартномани узайтириш устида иш олиб бормоқда.
«Кекса синьора»нинг сербиялик футболчи билан янги битим имзолаш нияти бир неча ҳафта олдин маълум бўлган эди. Sky Sport берган маълумотларга кўра, сешанба куни томонлар келгуси ҳамкорлик шартларини муҳокама қилиш учун учрашув ўтказишган. 26 ёшли футболчининг юқори маоши Турин клуби учун ҳамон асосий тўсиқ бўлиб қолмоқда, бироқ музокаралар шу билан тўхтаб қолмайди. «Ювентус» Влаховичнинг истеъдодига шубҳа қилмаяпти, бош мураббий Лучано Спаллетти эса уни лойиҳанинг асосий фигураси деб ҳисоблайди ва шартнома узайтирилишини талаб қилмоқда.
Ҳужумчининг ўзи ҳам жамоада қолишни истайди. Яқин келажакда футболчи ва клуб келишувнинг молиявий жиҳатлари бўйича муросага келишга ҳаракат қилиб кўришади.
