Мадриднинг «Атлетико» клуби бош мураббийи Диего Симеоне жамоаси Испания Кубоги финалига чиққанидан кейин ўз ҳиссиётлари билан ўртоқлашди.

«Матрасчилар» «Камп Ноу»да «Барселона»га йирик (0:3) ҳисобда имкониятни бой беришди, бироқ ўз уйларидаги баҳсда бундан ҳам йирикроқ (4:0) ғалабага эришишгани сабабли қарама-қаршиликда ғолиб чиқишди.

«Таблода ҳисоб 3:0 бўлиб турганда, мен: «Бу — «Атлетико», дедим. Бугун бизга анча қийин бўлди, лекин жамоа қийинчиликларни енгиб ўтганидан фахрланаман ва хурсандман. Икки ўйиндан иборат тўқнашувларнинг ўзига хос жиҳати ҳам шунда», — деди Диего Симеоне ўйиндан кейинги интервьюсида.

Финалда «Атлетико» ё «Реал Сосьедад», ёки Бильбаонинг «Атлетик» жамоаси билан ўйнайди (биринчи ўйин — 1:0).