«Барселона» Испания Кубоги ярим финали доирасида Мадриднинг «Атлетико» клубига қарши кечган жавоб учрашувида (3:0) бир йўла иккита қанот ҳимоячисини йўқотди.

Ўйиннинг 13-дақиқасида Жюль Кунде майдонни тарк этди ва унинг ўрнига Алехандро Бальде тушди. Бироқ ёш испаниялик футболчи ҳам баҳсни охиригача етказа олмади — 71-дақиқада у ҳам жароҳат олиб, майдондан чиқишга мажбур бўлди. Журналист Санти Овалленинг хабар беришича, ҳар икки футболчининг тизза ости пайлари шикастланган. Тиббий кўрик чоршанба куни ўтказилади, аммо ҳозирнинг ўзидаёқ уларнинг тикланиши тахминан уч ҳафта вақт олиши маълум.

3:0 ҳисобидаги ғалаба «Барселона»га финалга чиқиш учун кифоя қилмади. «Матрасчилар» Мадриддаги дастлабки баҳсда қўлга киритилган йирик ғалаба (4:0) эвазига икки ўйин натижасига кўра устун келишди.