"Удинезе" ҳимоячиси Умар Соле фаолиятини Италиянинг янада нуфузлироқ клубида давом эттириши мумкин. Tribal Football журналистлари берган маълумотга кўра, 26 ёшли футболчининг хизматларига Миланнинг "Интер" клуби қизиқиш билдирмоқда.

Франциялик футболчи "нерадзуррилар" сафида нидерландиялик ҳимоячи Стефан де Врейнинг ўрнини эгаллаши мумкин. Transfermarkt портали Солени 20 миллион еврога баҳолаган. Ҳимоячининг "Удинезе" билан амалдаги меҳнат шартномаси 2027 йил июнь ойи охирида якунига етади.

Италия чемпионатининг жорий мавсумида Умар 26 та учрашув ўтказди. Ҳимоячи ўз ҳисобига учта гол ва битта голли узатмани ёздириб қўйган.