"Манчестер Юнайтед"нинг афсонавий собиқ ярим ҳимоячиси Пол Скоулз Англия Премьер-лигасининг жорий мавсумидаги чемпионлик пойгаси ҳақида ўз фикрини билдирди.
Ҳозирги вақтда турнир жадвалини 64 очко жамғарган "Арсенал" бошқариб бормоқда. Иккинчи ўринда эса битта захира ўйинига эга бўлган ва пешқадамдан беш очко ортда қолаётган "Манчестер Сити" бормоқда.
"Агар ушбу икки жамоадан бирини танлаш керак бўлса, мен "Манчестер Сити"ни айтган бўлардим. Бироқ бу мавсумда умуман титулни топшириш керакмикан, деб иккиланиб қоламан. Биламан, ким ғалаба қозонса ҳам, одамлар доим ғолибни бунга лойиқ деб аташади, лекин бу сафар ҳеч қайси жамоа мени ишонтира олмаяпти. Ҳеч ким чемпионликка лойиқдек кўринмаяпти", – деди Скоулз The Good, The Bad & The Football подкастида.
Бундан олдин собиқ хавбек "Арсенал" "Премьер-лига тарихидаги энг ёмон чемпион"га айланиши мумкинлигини таъкидлаган эди.
