Туркиянинг "Галатасарой" жамоаси мухлислари УЕФА Чемпионлар Лигаси доирасидаги ўйиндаги хулқ-атвори учун жазоланди. Бу ҳақда мусобақа ташкилотчиси матбуот хизмати хабар бермоқда.
25 февраль куни бўлиб ўтган "Ювентус"га қарши жавоб учрашувида ишқибозлар пиротехника воситаларидан фаол фойдаланишган ва трибуналардан турли буюмларни майдонга улоқтиришган. Якунда "Галатасарой" зиммасига 40 минг евро миқдорида жарима тўлаш мажбурияти юкланди, унинг мухлислари эса Чемпионлар Лигаси доирасидаги "Ливерпуль"га қарши сафар ўйини учун чипта сотиб олиш ҳуқуқидан маҳрум этилди.
"Ливерпуль" турнирнинг 1/8 финали доирасида 18 март куни "Галатасарой"ни қабул қилади. Дастлабки учрашув 10 март кунига режалаштирилган. Мусобақанинг умумий босқичида жамоалар мос равишда учинчи ва йигирманчи ўринларни эгаллашган.
