Миланнинг "Интер" клуби раҳбари Жузеппе Маротта Лондоннинг "Арсенал" клуби ҳужумчи Франческо Пио Эспозитога қизиқиш билдираётгани ҳақидаги саволга жавоб берди.
20 ёшли футболчининг Англияга эҳтимолий трансфери ҳақидаги миш-мишлар ўтган ойда пайдо бўлган эди. "Нерадзуррилар" президенти Италия Кубоги ярим финали доирасидаги "Комо"га қарши ўйин олдидан журналистлар билан суҳбатда бу маълумотни рад этди.
"Арсенал" бизга мурожаат қилгани йўқ ва "Интер" уни сотиш ниятида эмас. Франческо — бизнинг хазинамиз, у академиямизда вояга етган. Агар трансфер ҳақидаги гаплар долзарб бўлса ҳам, бу фақат олис келажакда юз бериши мумкин", – деди Маротта Mediaset нашрига берган интервьюсида.
Transfermarkt сайтида Франческо Пио Эспозитонинг тахминий қиймати 35 миллион евро этиб белгиланган. Форварднинг шартномаси 2030 йилгача мўлжалланган.
