"Барселона" бош мураббийи Ханс-Дитер Флик Испания Кубоги ярим финали доирасидаги "Атлетико"га қарши жавоб учрашувидан (3:0, биринчи ўйин — 0:4) сўнг жамоадаги жароҳатлар билан боғлиқ вазият ҳақида фикр билдирди.
"Бизда яна иккита жароҳат бор. Бальде ва Кунде сафдан чиқди, бу жуда ёмон. Мен бу вазиятдан норозиман. Бир нечта футболчиларимиз ўйиндан ташқарида қолди, бу нотўғри. Бир ҳафта ичида уч нафар футболчи жароҳат олишининг олдини қандай олиш борасида тиббий штаб ва жисмоний тайёргарлик бўйича ходимлар билан гаплашиб олишимиз керак", — дея Фликнинг сўзларини келтиради Mundo Deportivo нашри.
Эслатиб ўтамиз, аввалроқ Левандовски чап кўз косасининг ички қисмидаги суяк синиши жароҳатини олган эди. Испания Кубоги ярим финали вақтида эса ҳимоячилар Жюль Кунде ва Алекс Бальде жароҳат сабабли ўйинни муддатидан олдин якунлашди.
