Ҳужумчи Пауло Дибала соғлиғи билан боғлиқ муаммоларга дуч келишда давом этмоқда. TuttoMercatoWeb нашри хабарига кўра, пайшанба куни аргентиналик футболчи машғулотни муддатидан олдин тарк этган — унинг тиззасида яна оғриқ пайдо бўлган.

Манбанинг таъкидлашича, Дибала Италия чемпионатининг 8 март куни бўлиб ўтадиган «Женоа»га қарши ўйинида майдонга туша олмайди. Бу Пауло учун «Рома» сафида жароҳат туфайли ўтказиб юборилган 41-учрашув бўлади.

Дибала охирги марта «Рома» либосида шу йилнинг 25 январида майдонга тушган эди. Шундан сўнг у айнан шу тиззасидаги муаммо сабабли бир нечта ўйинларни ўтказиб юборди. Эътиборлиси, «Ювентус»га қарши кечган сўнгги баҳсда Пауло қайдномага киритилган эди, бироқ майдонда кўриниш бермади.