Hujumchi Paulo Dibala sog‘lig‘i bilan bog‘liq muammolarga duch kelishda davom etmoqda. TuttoMercatoWeb nashri xabariga ko‘ra, payshanba kuni argentinalik futbolchi mashg‘ulotni muddatidan oldin tark etgan — uning tizzasida yana og‘riq paydo bo‘lgan.
Manbaning ta’kidlashicha, Dibala Italiya chempionatining 8 mart kuni bo‘lib o‘tadigan «Jenoa»ga qarshi o‘yinida maydonga tusha olmaydi. Bu Paulo uchun «Roma» safida jarohat tufayli o‘tkazib yuborilgan 41-uchrashuv bo‘ladi.
Dibala oxirgi marta «Roma» libosida shu yilning 25 yanvarida maydonga tushgan edi. Shundan so‘ng u aynan shu tizzasidagi muammo sababli bir nechta o‘yinlarni o‘tkazib yubordi. E’tiborlisi, «Yuventus»ga qarshi kechgan so‘nggi bahsda Paulo qaydnomaga kiritilgan edi, biroq maydonda ko‘rinish bermadi.
