Madridning "Real" klubi darvozaboni Tibo Kurtua La Liga doirasida "Espanyol"ga qarshi o‘tkazilgan uchrashuvda jamoasining o‘yini haqida fikr bildirdi.

Joze Mourinyu qaytganidan keyingi ilk rasmiy bahs "Real"ning "Espanyol" ustidan 2:1 hisobidagi g‘alabasi bilan yakunlandi. "Qaymoqranglilar" uch ochkoni o‘yin so‘nggida ilib ketishdi — zaxiradan maydonga tushgan Karlos Espi 90-daqiqada g‘alaba golini urdi.

"Hozircha xulosa chiqarishga erta, ammo biz albatta kuchayib boramiz. Mourinyu qo‘l ostida maydonda intizom hukmron, barcha birgalikda va muvofiq harakat qilmoqda. Bizda aniq o‘yin uslubi bor. Mashg‘ulotlarni juda yaxshi o‘tkazyapmiz, endi rejaga amal qilishda davom etishimiz kerak. Vaqt o‘tishi bilan yanada o‘sishga erishamiz", — deya Kurtuaning so‘zlarini keltiradi Madrid Zone.

Joze Mourinyu "Real"ga 13 yillik tanaffusdan so‘ng qaytdi. Iyun oyi boshida "O‘ziga xos" laqabi bilan tanilgan portugaliyalik mutaxassis jamoa bosh murabbiyi lavozimida Alvaro Arbeloani almashtirdi.