Мадриднинг “Реал” клуби ва Уэлс терма жамоасининг собиқ футболчиси Гарет Бэйл фаолиятидаги энг оғир учрашувлар “Барселона”га қарши кечганини маълум қилди.

“Барселона”га қарши ўйинлар энг қийини бўларди. Биз 80 дақиқа давомида шунчаки тўп ортидан қувиб юришимизни билардик. Лекин биз буни қабул қилганмиз. Мавсум давомидаги ушбу саноқли ўйинларда паст блокда (чуқур ҳимояда) ўйнашимизга тўғри келишига кўнган эдик. Чунки бизда мукаммал қарши ҳужумкор таркиб бор эди”, дейди уэлслик футболчи.

Бэйл, шунингдек, Роналдуга тўп узатилмаса ғазабланиши ҳақидаги саволга шундай жавоб берди:

“Албатта, 100 фоиз шундай бўларди. Лекин бу унинг ғалаба қозонишга бўлган иштиёқи билан боғлиқ. У доим рекордлар ортидан қувади ва Месси ҳам худди шундай натижалар қайд этаётганини билади. Шунинг учун ҳам унинг бу ҳолатини тушунаман. Мен ‘Реал Мадридъга келганимда, у гол машинасига айланиб улгурганди. У агар бор эътиборини фақат голларга қараца, якунда анча юқори баҳоланишини тушуниб етган эди”.

Футболчи “қироллик клуби” таркибида “Барселона”га қарши 15 та учрашув ўтказган, 2 та гол ва 1 та голли узатмага муаллифлик қилган. “Қаймоқранглилар” 3 та, “кўк-анорранглилар” эса 9 та учрашувда зафар қучган. 3 та баҳсда дуранг натижа қайд этилган.

Маълумот учун, Гарет Бэйл “Реал Мадрид” сафида жами 258 та учрашувда майдонга тушиб, 106 та гол урган ва 67 та голли узатмани амалга оширган. У мадридликлар билан 5 марта УЕФА Чемпионлар лигасида ғалаба қозонган.

Бэйл 2013 йилда Тоттенҳэм клубини тарк этиб, “Реал”га ўтганида ўша даврдаги энг қиммат футболчига айланган эди. 2020 йилда ижара асосида Англияга қайтганида, унинг ҳисобида Чемпионлар лигаси ғолиблари учун бериладиган тўртта медал мавжуд бўлган. Унинг қайтиши муваффақиятсиз бўлди: футболчи 34 та ўйинда 16 та гол урди, аммо жамоаси билан соврин юта олмади.