Madridning “Real” klubi va Uels terma jamoasining sobiq futbolchisi Garet Beyl faoliyatidagi eng og‘ir uchrashuvlar “Barselona”ga qarshi kechganini ma’lum qildi.

“Barselona”ga qarshi o‘yinlar eng qiyini bo‘lardi. Biz 80 daqiqa davomida shunchaki to‘p ortidan quvib yurishimizni bilardik. Lekin biz buni qabul qilganmiz. Mavsum davomidagi ushbu sanoqli o‘yinlarda past blokda (chuqur himoyada) o‘ynashimizga to‘g‘ri kelishiga ko‘ngan edik. Chunki bizda mukammal qarshi hujumkor tarkib bor edi”, deydi uelslik futbolchi.

Beyl, shuningdek, Ronalduga to‘p uzatilmasa g‘azablanishi haqidagi savolga shunday javob berdi:

“Albatta, 100 foiz shunday bo‘lardi. Lekin bu uning g‘alaba qozonishga bo‘lgan ishtiyoqi bilan bog‘liq. U doim rekordlar ortidan quvadi va Messi ham xuddi shunday natijalar qayd etayotganini biladi. Shuning uchun ham uning bu holatini tushunaman. Men ‘Real Madrid’ga kelganimda, u gol mashinasiga aylanib ulgurgandi. U agar bor e’tiborini faqat gollarga qarasa, yakunda ancha yuqori baholanishini tushunib yetgan edi”.

Futbolchi “qirollik klubi” tarkibida “Barselona”ga qarshi 15 ta uchrashuv o‘tkazgan, 2 ta gol va 1 ta golli uzatmaga mualliflik qilgan. “Qaymoqranglilar” 3 ta, “ko‘k-anorranglilar” esa 9 ta uchrashuvda zafar quchgan. 3 ta bahsda durang natija qayd etilgan.

Ma’lumot uchun, Garet Beyl “Real Madrid” safida jami 258 ta uchrashuvda maydonga tushib, 106 ta gol urgan va 67 ta golli uzatmani amalga oshirgan. U madridliklar bilan 5 marta UYEFA Chempionlar ligasida g‘alaba qozongan.

Beyl 2013 yilda Tottenhem klubini tark etib, “Real”ga o‘tganida o‘sha davrdagi eng qimmat futbolchiga aylangan edi. 2020 yilda ijara asosida Angliyaga qaytganida, uning hisobida Chempionlar ligasi g‘oliblari uchun beriladigan to‘rtta medal mavjud bo‘lgan. Uning qaytishi muvaffaqiyatsiz bo‘ldi: futbolchi 34 ta o‘yinda 16 ta gol urdi, ammo jamoasi bilan sovrin yuta olmadi.