АҚШ президенти Дональд Трамп Оқ уйда «Интер Майами» жамоасини қабул қилиш чоғида унинг ўғли Баррон Лионель Мессининг ашаддий мухлиси эканлигини маълум қилди.

«Бошқа ҳеч қайси президент айтмаган гапни айтиш мен учун катта шараф. Оқ уйга хуш келибсиз, Лионель Месси. У (Баррон) — сизнинг ашаддий мухлисингиз. У сизни шунчаки ажойиб инсон деб ҳисоблайди. У худди Роналду исмли джентльменнинг мухлиси бўлгани каби, сизнинг ҳам катта фанатингиздир... Криштиану — буюк. Сизлар ушбу спорт туридаги буюк спортчиларсиз», — дея Трампнинг сўзларидан иқтибос келтирмоқда «Sport Bible».

Қизиғи шундаки, 2025 йилнинг ноябрь ойида Трамп Оқ уйда Саудия Арабистони валиаҳд шаҳзодаси Муҳаммад ибн Салмон Ол Сауд шарафига уюштирилган маросимда ўғли Роналдунинг мухлиси эканлигини айтган ва португалиялик футболчини барча даврларнинг энг буюк ўйинчиси («G.O.A.T.») деб атаган эди.

«Интер Майами» МЛС Кубогидаги ғалаба муносабати билан Оқ уйга ташриф буюрди. Месси АҚШ президенти билан илк бор учрашди. Эслатиб ўтамиз, 2025 йилнинг январь ойида, давлат раҳбари Жо Байден бўлган вақтда, аргентиналик юлдуз президентлик медалини топшириш маросимида иштирок эта олмаган эди.