"Барселона" президенти Жоан Лапорта янги футболчиларни сотиб олишга бўлган ёндашуви ҳақида гапириб берди.
"Янги футболчи сотиб олиш учун ҳеч қачон ақлдан озганча иш тутмаган бўлардим. Мен фақат аллақачон сафимизда тўп сураётганлар учунгина ақл бовар қилмайдиган ишларни қилишга тайёрман. Ҳозирги таркибимиз — ҳар қандай қурбонликка лойиқ бўлган хазинадир. Бошқа клубларнинг ўйинчиларига келсак — ҳеч қандай телбаликларга йўл қўйилмайди", — деди Лапорта Mundo Deportivo нашрига берган интервьюсида.
Ҳозирги вақтда "Барселона" Ла Лига турнир жадвалида пешқадамлик қилмоқда ва 26 турдан сўнг Мадриднинг "Реал" клубини тўрт очкога ортда қолдирмоқда. Шанба куни, 7 мартда, Ханс-Дитер Флик шогирдлари сафарда "Атлетик" Бильбаога қарши баҳс олиб боришади.
