«Сантос» ҳужумчиси Неймарнинг ошпази меҳнат шартномаси талабларига риоя қилинмагани учун бразилиялик футболчини судга берди. Бу ҳақда Metrópoles хабар бермоқда.

Нашр маълумотига кўра, аёл футболчининг саройида кунига ўртача 14 соатдан ортиқ ишлаган. Шу тариқа Неймар меҳнат шартномасини бузган, чунки унга кўра ошпаз бир кунда 10 соатдан ортиқ ишламаслиги керак эди. Баъзи ҳолларда у бразилиялик футболчи таклиф қилган 150 нафар меҳмон учун таом тайёрлаш мақсадида соат 23:00 дан кейин, ҳатто ярим тунгача қолиб ишлашга мажбур бўлган. Бундан ташқари, аёл озиқ-овқат маҳсулотларини ҳам тушириш билан шуғулланган ва бу унинг умуртқа поғонасида муаммолар ҳамда сон бўғими яллиғланишига олиб келган.

Даъвогар тахминан 43 минг евро миқдорида товон пули тўлашни талаб қилмоқда. Ушбу сумма жарималар, қўшимча иш соатлари ва ўтказиб юборилган танаффуслар учун тўловлар, маънавий ва соғлиққа етказилган зарар учун компенсация, шунингдек тиббий харажатларни ўз ичига олади.