"Сўғдиёна" - "Қизилқум" жамоалари ўртасидаги ўйиндан кейинги матбуот анжуманида дастлаб зарафшонлик бош мураббийи Юрий Лукин иштирок этди.

— Иккинчи бўлимнинг дастлабки дақиқаларида киритилган тезкор гол бизнинг ўйинимизга салбий таъсир кўрсатди. Шундай бўлсада шогирдларим сўнгги дақиқаларгача курашишди.

— Жамоа қийин вазиятда қолаяпти. Оғир вазиятдан чиқиб кетишнинг бирор йўли борми?
— Олдимизда ҳали ўйинлар бор. Мавқеимизни тиклаб олишга ҳаракат қиламиз. Бизга асосий вазифа ҳам шундай юклатилган.

— Сизни биз собиқ ҳужумчи сифатида яхши биламиз. Жамоада ҳужум чизиғида муаммолар бордек...
— Ҳа, биз йиғинларни жуда кеч бошладик. Жамоа деярли янги таркиб билан йиғилганди. Биз уч жамоадан ҳозирги таркибимизни шакллантирдик. Ҳимоя, ҳужум ва умуман бошқа чизиқлар ҳақида гапиришга ҳали эрта деб ўйлайман.

— Зафар Тўраев яхши ҳаракат қилаётганди. Унинг алмаштирилишига нима сабаб бўлди?
— Тўғри. Лекин биз майдон марказидаги устунликни жиззахликларга бериб қўйган эдик. Ренат Байрамов майдон марказида эмин эркин ҳолатда “Сўғдиёна” ҳужумларини бошқариб турди. Лекин захирадан майдонга тушга футболчи Ренатга қарши курашларда имкониятларни бой берди.