"Сўғдиёна" - "Қизилқум" жамоалари ўртасидаги ўйиндан кейинги матбуот анжуманининг иккинчи қисмида Даврон Файзиев журналистларнинг саволларига жавоб берди.

— Ўйинимизга мухлислар баҳо беришади. Лекин мен мураббий сифатида шогирдларимнинг бугунги кўрсатган ўйинларидан кўнглим тўлгани йўқ. Бугунгача уй учрашувларимизда шогирдларим ҳаяжонга тушишмаганди. Лекин улар бугун қаттиқ ҳаяжон остида ҳаракат қилишди. Балки бу менинг ўйиндан олдин берган кўрсатмаларимга алоқадордир. Чунки бугунги ўйинда ғалаба қозонадиган бўлсак, мавқеимизни анча яхшилаб олган бўлардик. Йигитларга ҳимояда эҳтиётроқ бўлиб, ҳужумда қанотлардан аниқроқ ҳаракат қилиш вазифаси юклатилганди. Бугунги учрашувни “Олмалиқ” жамоаси билан бўлган ўйин билан солиштирадиган бўлсак, ер билан осмонча фарқи бор. Биринчи бўлимда бизда уюшқоқлик етишмади.

— “Сўғдиёна“ жамоаси меҳмондаги учрашувларда ҳам ижобий натижа қайд эта оладими?
— Тўғри савол бердингиз. Мен ҳам шу ҳақида доим ўйлайман. Мен мураббий сифатида олий лигада ҳали меҳмонда очко ололганимиз йўқ. Биз бу анъанага чек қўйиш учун навбатдаги учрашувларда бор кучимиз билан ҳаракат қиламиз.