«Борнмут» ярим ҳимоячиси Маркус Тавернье фаолиятини Англия Премьер-лигасининг бошқа клубида давом эттириши мумкин. Бу ҳақда Daily Mail журналистлари хабар бермоқда.

Манбанинг маълумотларига кўра, «Манчестер Юнайтед» футболчини ўз сафига қўшиб олишдан манфаатдор. «Қизил иблислар» жорий мавсум якунланганидан сўнг ўйинчининг трансферини амалга оширишни кўзламоқда.

Манкунианликларнинг Тавернье учун курашдаги рақобатчилари сифатида «Ноттингем Форест» ва Бирмингемнинг «Астон Вилла» клублари тилга олинмоқда.

Англия Премьер-лигасининг жорий мавсумида 26 ёшли ярим ҳимоячи 25 та учрашувда майдонга тушди. Маркус ўз ҳисобига 5 та гол ва 4 та голли узатмани ёздириб қўйишга муваффақ бўлди.