Бильбаонинг «Атлетик» клуби бош мураббийи Эрнесто Вальверде «Барселона»га қарши кечган баҳсдаги ҳакамлик борасида ўз фикрлари билан ўртоқлашди.
«Ҳакам ҳақида ҳеч нарса дея олмайман. Кубарси қизил карточкага лойиқ эмас эди, чунки Жоан Гарсия тўпга етиб бориши мумкин эди. Иньякида эса ҳеч қандай имконият йўқ эди. Албатта, мен воқеаларга доимо ўз нуқтаи назаримдан ва шахсий қарашларимдан келиб чиқиб баҳо бераман», — деди Вальверде журналистларга.
Испания чемпионати 27-туридан ўрин олган мазкур учрашув «Атлетик»нинг 0:1 ҳисобидаги мағлубияти билан якунланди. Ўйиннинг 57-дақиқасида каталонияликлар ҳимоячиси Пау Кубарси жарима майдончасига ёриб киришга интилаётган ҳужумчи Иньяки Уильямсни йиқитди. Ҳакам бу вазиятда сариқ карточка кўрсатди, бироқ «Атлетик» футболчилари бу қарордан норози бўлиб, қизил карточка талаб қилишди.
