Якшанба, 8 март куни Италия чемпионатининг 28-тури доирасида «Милан» «Интер»га қарши майдонга тушади. «Россонерилар»нинг марказий ярим ҳимоячиси Лука Модрич ушбу муҳим дербига алоҳида тайёргарлик кўрди. Sky Sport Italia нашрининг хабар беришича, хорватиялик футболчи ушбу учрашув учун 60 та чипта сотиб олган.
Тошкент вақти билан тунги соат 00:45 да бошланадиган ўйинга Модричнинг яқинлари ва дўстлари ташриф буюришади. Шунингдек, стадионда футболчининг ватандоши — Хорватия терма жамоаси ва «Милан»нинг собиқ ҳужумчиси Марио Манжукич ҳам бўлиши кутилмоқда.
Айни дамда Массимилиано Аллегри шогирдлари А Серия турнир жадвалида иккинчи ўринда боришмоқда. 27-турдан кейин пешқадам «Интер» билан орадаги фарқ 10 очкони ташкил этмоқда.
