Португалия чемпионатининг 25-тури доирасида бўлиб ўтган марказий учрашувда «Бенфика» ва «Порту» 2:2 ҳисобида дуранг ўйнашди. Баҳс Лиссабондаги «Эштадиу да Луж» стадионида бўлиб ўтди.

Биринчи бўлимда меҳмонлар сафида Виктор Фрохольдт ва Оскар Пиетушевски гол уришга муваффақ бўлишди. Иккинчи бўлимда эса мезбонлардан Андреас Шельдеруп фарқни қисқартирган бўлса, 89-дақиқада Леандру Баррейру ҳисобни тенглаштирди.

Ўйиннинг 90+1-дақиқасида «Бенфика» бош мураббийи Жозе Моуриньо ва захирага олинган ҳимоячи Николас Отаменди қизил карточка олиб, майдондан четлатилди.

Айни дамда «Бенфика» 59 очко билан чемпионат жадвалида учинчи ўринни эгаллаб турибди. «Порту» эса 66 очко билан пешқадамлик қилмоқда.