«Барселона» президенти Жоан Лапорта Лионель Мессининг амалга ошмай қолган қайтиши билан боғлиқ вазиятга изоҳ берди.
Яқиндагина «кўк-анорранглилар»нинг собиқ мураббийи Хави Эрнандес интервью бериб, унда Лапортанинг ўзи 2023 йилда, келишув деярли имзоланиш арафасида турганда аргентиналик юлдузнинг қайтишини рад этгани ҳақида сўзлаб берган эди.
«2023 йилда Хави олдимга келиб, Месси унга қайтиш истаги борлигини айтганини билдирди. У мендан Хорхе Мессига [футболчининг отаси] таклиф юбориш учун шартнома тайёрлашни илтимос қилди. Бу тахминан март ойининг ўрталарида содир бўлганди. Аммо май ойида Хорхе Мессининг ўзи олдимга келди ва ўғлининг «Барса»га қайтиши имконсиз эканини, чунки улар «Интер Майами»ни танлашганини айтди. Мен эса уларнинг қарорини ҳурмат қилишимни ва тўлиқ қабул қилишимни билдирдим», — дея Лапортанинг сўзларидан иқтибос келтирмоқда BarcaTimes.
Лионель Месси ўша 2023 йилнинг ёзида «ПСЖ»дан эркин агент мақомида «Интер Майами»га кўчиб ўтган эди.
