Мадриднинг «Реал» клуби бош мураббийи Альваро Арбелоа жамоанинг сўнгги қатор муваффақиятсиз натижалари ортидан яқин ҳафталарда ўз лавозимини тарк этиши мумкин. Бу ҳақда El Nacional хабар бермоқда.

Манбага кўра, испаниялик мутахассиснинг аҳволи бир неча омадсиз ўйинлардан кейин анча мураккаблашган. Энг оғриқли натижалардан бири Испания Кубогида иккинчи дивизионда иштирок этаётган «Альбасете»га қарши мағлубият бўлди.

Бундан ташқари, «қироллик клуби» Испания чемпионатида «Осасуна» ва «Хетафе»дан ҳам мағлуб бўлди. Бу эса жамоанинг Ла Лига турнир жадвалидаги аҳволини янада қийинлаштирди. Яқинлашиб келаётган халқаро танаффусгача мадридликлар бир нечта муҳим ўйин ўтказиши керак.

Испания чемпионати доирасида «Реал» «Эльче» ва Мадриднинг «Атлетико» клубларига қарши майдонга тушади. Шунингдек, жамоани Чемпионлар лигаси 1/8 финалида «Манчестер Сити»га қарши баҳс кутмоқда. Бу қарама-қаршилик натижаси бош мураббийнинг кейинги тақдирига таъсир қилиши мумкин.

Хабар қилинишича, клуб раҳбарияти вазиятни таҳлил қилишда давом этмоқда ва яқиндаги натижалар Арбелоанинг келажаги бўйича қарор қабул қилишда ҳал қилувчи аҳамият касб этиши мумкин. Таъкидланишича, халқаро танаффус клуб мураббийлар штаби бўйича якуний қарор қабул қиладиган вақтга айланиши мумкин.