Madridning «Real» klubi bosh murabbiyi Alvaro Arbeloa jamoaning so‘nggi qator muvaffaqiyatsiz natijalari ortidan yaqin haftalarda o‘z lavozimini tark etishi mumkin. Bu haqda El Nacional xabar bermoqda.

Manbaga ko‘ra, ispaniyalik mutaxassisning ahvoli bir necha omadsiz o‘yinlardan keyin ancha murakkablashgan. Eng og‘riqli natijalardan biri Ispaniya Kubogida ikkinchi divizionda ishtirok etayotgan «Albasete»ga qarshi mag‘lubiyat bo‘ldi.

Bundan tashqari, «qirollik klubi» Ispaniya chempionatida «Osasuna» va «Xetafe»dan ham mag‘lub bo‘ldi. Bu esa jamoaning La Liga turnir jadvalidagi ahvolini yanada qiyinlashtirdi. Yaqinlashib kelayotgan xalqaro tanaffusgacha madridliklar bir nechta muhim o‘yin o‘tkazishi kerak.

Ispaniya chempionati doirasida «Real» «Elche» va Madridning «Atletiko» klublariga qarshi maydonga tushadi. Shuningdek, jamoani Chempionlar ligasi 1/8 finalida «Manchester Siti»ga qarshi bahs kutmoqda. Bu qarama-qarshilik natijasi bosh murabbiyning keyingi taqdiriga ta’sir qilishi mumkin.

Xabar qilinishicha, klub rahbariyati vaziyatni tahlil qilishda davom etmoqda va yaqindagi natijalar Arbeloaning kelajagi bo‘yicha qaror qabul qilishda hal qiluvchi ahamiyat kasb etishi mumkin. Ta’kidlanishicha, xalqaro tanaffus klub murabbiylar shtabi bo‘yicha yakuniy qaror qabul qiladigan vaqtga aylanishi mumkin.