«Ливерпуль» ярим ҳимоячиси Флориан Вирц Муҳаммад Салоҳ унга клубга мослашишда қандай ёрдам берганини эслади.

Германиялик футболчи ўтган йилнинг ёзида 125 миллион евро эвазига «Байер»дан «қизиллар» сафига келиб қўшилган эди. Юлдуз янги ўйинчи учун Англиядаги дастлабки ойлар бироз мураккаб кечди: у доимий равишда танқидларга учради ва узоқ вақт давомида самарали ҳаракатлари билан ажралиб тура олмади.

«Салоҳ менга доимо ёрдам беришга ҳаракат қиларди, мен билан суҳбатлашарди. У ҳам «Ливерпуль»га ёш пайтида келган ва катта трансфер бўлган эди. Ўзимни эркин ҳис қилишим учун у биринчи бўлиб гап бошлашга ҳаракат қиларди», — дея Вирцнинг сўзларини келтиради Anfield Sector.

22 ёшли ҳужумкор ярим ҳимоячи «Ливерпуль» сафида барча мусобақаларда 36 та ўйинда майдонга тушиб, 6 та гол ва 8 та голли узатмани амалга оширди.