Нидерландия терма жамоаси бош мураббийи, илгари «Барселона»да фаолият юритган Рональд Куман Педри ва Лионель Месси ўртасидаги ҳамкорлик ҳақида сўзлаб берди.

Айнан нидерландиялик мутахассис қўл остида испаниялик ярим ҳимоячи «кўк-анорранглилар»нинг асосий таркибидаги илк қадамларини ташлаган эди.

«Ўшанда мен Педри билан эндигина танишгандим. «Барселона» уни «Лас-Пальмас»дан сотиб олганди ва мен унинг кимлигини билмасдим. Дастлаб уни ижарага бериб юбориш режалаштирилган эди. Икки кунлик машғулотлардан сўнг унинг ақл бовар қилмас футболчи эканлигини тушундим, лекин мени энг кўп ҳайратда қолдирган нарса унинг Месси билан ўзаро тушуниши бўлди: Лео доимо у билан ўйнашга ҳаракат қилар, фақат унга пас берарди. Ишонинг, агар Месси сизни қадрламаса, сизга доимий равишда пас бермайди — у шунчаки сизни четлаб ўтади. Мен учун бу Педрини олиб қолиш ҳақидаги қарорим тўғри бўлганининг якуний тасдиғи бўлганди», — деди Куман.

Мураббий 2021 йилда, Месси жамоани тарк этганидан кўп ўтмай, «Барса»дан истеъфога чиқарилган эди.