Лондоннинг «Челси» клуби ёзги трансфер ойнасида таркибини сезиларли даражада кучайтиришни режалаштирмоқда. Football365 нашрининг таъкидлашича, «аристократлар» «Барселона»нинг уч нафар юлдуз футболчисини ўз сафига қўшиб олишни мақсад қилган. Булар — вингер Рафинья, ҳимоячи Жюль Кунде ҳамда ярим ҳимоячи Дани Ольмодир.

Қайд этилишича, «Челси» раҳбарияти ушбу трио учун жами 250 миллион евро сарфлашга тайёр. Хабарларга кўра, клуб эгаси Тодд Боэли ушбу трансферлар орқали жамоанинг ҳужум ва ҳимоя чизиғидаги муаммоларини ҳал қилмоқчи.

Аввалроқ ОАВда «Барселона» молиявий ҳолатини барқарорлаштириш мақсадида келаси ёзда ўз етакчи футболчиларини сотиш имкониятларини кўриб чиқишга тайёрлиги ҳақида хабарлар тарқалган эди. Бу вазият «Челси»га ўз мақсадини амалга ошириш учун яхши имконият яратиши мумкин.