Каталониянинг «Барселона» клуби ҳужумчиси Ламин Ямал Чемпионлар лигасининг барча мумкин бўлган рекордлар китобини қайта ёзишда давом этмоқда. Сешанба оқшомида у ушбу нуфузли турнирдаги ўзининг 30-учрашувини ўтказди. Бундан ташқари, Ямал ушбу кичик юбилейни муносиб тарзда нишонлади — «Ньюкасл»га қарши баҳсда «Барселона»ни мағлубиятдан қутқариб қолган голга муаллифлик қилди.
Ламин Ямал 18 ёшу 240 кунлигида Чемпионлар лигасида 30 та ўйин ўтказган энг ёш футболчига айланди. У «ПСЖ» футболчиси Уоррен Заир-Эмерининг натижасини деярли бир йилга янгилади. Эслатиб ўтамиз, Заир-Эмери аввалроқ ушбу маррага 19 ёшу 227 кунлигида эришган эди.
