"Милан" клуби Мойзе Кинни сотиб олишни кўзламоқда.
La Gazzetta dello Sport нашрининг тасдиқлашича, "россонерилар" айнан шу турдаги ҳужумчига эҳтиёж сезмоқда ва "Фиорентина" футболчисини қанчага сотиб олиш мумкинлигини аниқлаштириш ниятида.
Июль ойининг дастлабки 15 куни давомида футболчининг шартномасида 62 миллион евролик товон пули ҳақидаги банд амал қилади. Бироқ Киннинг у қадар муваффақиятли чиқмаган мавсумидан сўнг (А Сериянинг 24 та ўйинида 8 та гол), бу рақамлар катта аҳамиятга эга эмас. Миланликлар яқин бир неча ҳафта ичида қанча миқдорда чегирма олиш мумкинлиги бўйича маълумот тўпламоқчи.
Мойзе йилига 4,5 миллион евро маош олади ва у "Милан" бош мураббийи Массимилиано Аллегрига "Ювентус"даги фаолияти орқали жуда яхши таниш.
Шунингдек, "қизил-қоралар" Кинга муқобил сифатида Дортмунднинг "Боруссия" клуби ҳужумчиси Серу Гирасси номзодини ҳам кўриб чиқишмоқда. Душан Влаховичга бўлган қизиқиш ҳам сақланиб қолган, бироқ сербиялик футболчи "Ювентус" билан шартномани узайтириш бўйича музокараларни қайта бошлаган.
