Рақамли хатарларни бошқариш билан шуғулланувчи Bi.Zone компанияси маълум қилишича, йил бошидан буён турли домен зоналарида футбол бўйича 2026 йилги Жаҳон чемпионати номи билан боғлиқ қарийб 2,7 мингта фирибгар веб-сайт аниқланган.
Компания бундай сайтлар қайси давлатларнинг домен зоналарида рўйхатдан ўтказилганини ошкор қилмаган, бироқ қуйидаги статистик маълумотларни тақдим этган:
2025 йил октябрь — 600 та сайт;
2025 йил ноябрь — 700 та сайт;
2025 йил декабрь — 1 000 та сайт;
2026 йил январь — 1 200 та сайт;
2026 йил февраль — 1 500 та сайт (бу кўрсаткич фирибгар сайтлар сони фаол ўсиш босқичига ўтганини кўрсатади).
Футбол бўйича 2026 йилги Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Турнир тарихда илк бор 48 та миллий терма жамоа иштирокида ташкил этилади.
Ўзбекистон терма жамоаси гуруҳ босқичидаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади.
Жамоа иккинчи турда Криштиану Роналду бошчилигидаги Португалия терма жамоаси билан ўйнайди. Мазкур беллашув АҚШдаги “NRG” стадионида бўлиб ўтади.
Фабио Каннаваро бошчилигидаги жамоа гуруҳ босқичининг сўнгги турини Атлантадаги “Mersedes-Benz” стадионида ўтказади.
