Raqamli xatarlarni boshqarish bilan shug‘ullanuvchi Bi.Zone kompaniyasi ma’lum qilishicha, yil boshidan buyon turli domen zonalarida futbol bo‘yicha 2026 yilgi Jahon chempionati nomi bilan bog‘liq qariyb 2,7 mingta firibgar veb-sayt aniqlangan.

Kompaniya bunday saytlar qaysi davlatlarning domen zonalarida ro‘yxatdan o‘tkazilganini oshkor qilmagan, biroq quyidagi statistik ma’lumotlarni taqdim etgan:

2025 yil oktyabr — 600 ta sayt;
2025 yil noyabr — 700 ta sayt;
2025 yil dekabr — 1 000 ta sayt;
2026 yil yanvar — 1 200 ta sayt;
2026 yil fevral — 1 500 ta sayt (bu ko‘rsatkich firibgar saytlar soni faol o‘sish bosqichiga o‘tganini ko‘rsatadi).

Futbol bo‘yicha 2026 yilgi Jahon chempionati 11 iyundan 19 iyulgacha AQSH, Kanada va Meksikada bo‘lib o‘tadi. Turnir tarixda ilk bor 48 ta milliy terma jamoa ishtirokida tashkil etiladi.

O‘zbekiston terma jamoasi guruh bosqichidagi ilk o‘yinini Meksikada o‘tkazadi, qolgan ikki uchrashuv esa AQSHdagi stadionlarda bo‘lib o‘tadi. “Oq bo‘rilar” birinchi turda Kolumbiyaga qarshi maydonga tushadi. Ushbu uchrashuvga Meksika poytaxtidagi “Asteka” stadioni mezbonlik qiladi.

Jamoa ikkinchi turda Krishtianu Ronaldu boshchiligidagi Portugaliya terma jamoasi bilan o‘ynaydi. Mazkur bellashuv AQSHdagi “NRG” stadionida bo‘lib o‘tadi.

Fabio Kannavaro boshchiligidagi jamoa guruh bosqichining so‘nggi turini Atlantadagi “Mersedes-Benz” stadionida o‘tkazadi.