Европа Чемпионлар Лигаси 1/8 финал босқичи доирасида Мадриднинг “Реал” клубига қарши ўйинда 0:3 ҳисобида мағлуб бўлган “Манчестер Сити” футболчилари учрашувдан сўнг чуқур тушкунлик ҳолатига тушиб қолган. Бу ҳақда Daily Mail нашри хабар берди.
Манбага кўра, ўйин тугагач, “шаҳарликлар” кийиниш хонасида оғир муҳит ҳукм сурган. Футболчилар бир-бири билан деярли гаплашмаган, айримларида ҳатто душ қабул қилишга ҳам хоҳиш қолмаган. Жамоа аъзолари узоқ вақт сукут сақлаган ҳолда кийиниш хонасида қолиб кетгани айтилмоқда.
Шунингдек, футболчилар клуб автобусига ҳам белгиланган вақтдан анча кеч қайтган. Ўша пайтда ҳам улар шок ҳолатида бўлиб, жимжитлик сақлаганлари таъкидланади.
Мазкур баҳсда “Манчестер Сити”нинг ўзбекистонлик ҳимоячиси Абдуқодир Ҳусанов асосий таркибда майдонга тушиб, тўлиқ 90 дақиқа ҳаракат қилди.
Эслатиб ўтамиз, “Реал Мадрид” УЕФА Чемпионлар Лигаси 1/8 финал босқичининг дастлабки учрашувида “Манчестер Сити”ни 3:0 ҳисобида мағлуб этди. Жамоалар ўртасидаги жавоб учрашуви 17 март куни Манчестердаги “Etihad” стадионида бўлиб ўтади. Учрашув Тошкент вақти билан 18 мартга ўтар кечаси соат 01:00 да бошланади.













