Италиянинг "Ювентус" клуби келаси мавсум учун ҳужум чизиғини кучайтириш ишларини бошлаб юборди. Бу ҳақда La Gazzetta dello Sport нашри хабар бермоқда.
Манба берган маълумотларга кўра, "Барселона" ҳужумчиси Роберт Левандовски жамоанинг трансфер рўйхатига киритилган. "Ювентус" бош мураббийи Лучано Спаллетти жамоага эркин агент сифатида қўшилиши мумкин бўлган польшалик фахрий футболчининг тажрибаси катта фойда беради деб ҳисоблайди. Аввалроқ Левандовски Туринга кўчиб ўтишга маълум даражада қизиқиш билдирган эди, бироқ якуний қароргача ҳали вақт бор. Унга MLS клубларидан жозибадор таклифлар тушмоқда, шунингдек, футболчининг маош бўйича талаблари "бьянконерилар" бюджетига бироз оғирлик қилиши мумкин.
Левандовскидан ташқари, "Ювентус" скаутлари АЗ клубининг истиқболли ёш ўйинчиси Бендегуз Ковачга ҳам эътибор қаратишган. 18 ёшли венгриялик футболчи УЕФА Ёшлар лигасидаги 6 та ўйинда 9 та гол уриб, кўпчиликнинг диққатини тортди. Ковачнинг трансфери 5 миллион еврога баҳоланмоқда, бироқ бу курашда "Ювентус" Дортмунднинг "Боруссия"си, "Астон Вилла" ва "Спортинг" каби клублар билан рақобатлашишига тўғри келади.
