Репортёр Доминик Северак мухлисларнинг «Пари Сен-Жермен» клубидаги ишлар ҳолати ҳақидаги саволларига жавоб берди. Суҳбат давомида бошқа мавзулар қатори испаниялик ярим ҳимоячи Фабиан Руис ҳақида ҳам сўз борди.
Северак Руиснинг жамоада қолиши ҳақидаги маълумотлар билан ўртоқлашди. Бир неча кун олдин футболчининг агенти ўз мижози ватанига қайтишга қарши эмаслигини таъкидлаган эди.
«Руис, Баркола ва Луис Энрике шартномаларини узайтиришади. Руис билан боғлиқ масала деярли ҳал бўлган, Баркола бўйича ишлар анча яхши кетмоқда, Энрике билан эса принципиал келишувга эришилди. Дембеле бўйича музокаралар ҳали бошлангани йўқ», — дея журналистнинг сўзларидан иқтибос келтиради Le Parisien.
Ушбу мавсумда Руис 24 та ўйинда иштирок этиб, 2 та гол урди ва 3 та голли узатмани амалга оширди. Ҳозирда футболчи тиззасидан олган жароҳатидан сўнг тикланиш жараёнини ўтамоқда.
